Afeitos os dous a mesturar no seu traballo elementos da música, o cómic clásico ou a oralidade, os seus traballos insírense nunha contemporaneidade repleta de referencias culturais populares, lonxe das torres de marfil. Coloquiais, irónicos e ben próximos soan os poemas destes dous autores con pouca pose de poetas. Eles lerán os seus propios poemas nun acto dunha hora de duración, a partir das 20:30h.

O lugués Lois Pérez está de actualidade literaria pola aínda recente e exitosa publicación en Xerais do seu primeiro poemario individual como tal: Long Play, que logo dunha xira de presentacións por toda Galicia, vai xa pola segunda edición. Ademais de poeta, Pérez é ou foi soldador, xogador profesional na selección nacional de fútbol sala, mestre do ensino público, locutor de radio, columnista, teatreiro e contador de historias.

Frank Báez (Santo Domingo, 1978) está considerado un dos máis renovadores e interesantes autores de Centroamérica, ten tres libros de poesía publicados e dous máis, en tradución ao inglés e ao árabe, en Estados Unidos e en Exipto. Publicou tamén crónica e mais a colección de contos Págales tú a los psicoanalistas. Traballa como editor de revistas culturais e fundou o proxecto de spoken Word El Hombrecito.