Requisitos comúns

• Posuír a nacionalidade española ou a dalgún dos Estados membros da UE ou do Espazo Económico Europeo, Suíza, ou o parentesco determinado pola normativa que lle sexa de aplicación. No caso de estranxeiros non comunitarios, deberán contar con autorización de estancia ou residencia en España.
• Que a persoa solicitante e as demais persoas integrantes da súa unidade de convivencia estean empadroadas na vivenda adquirida no momento de presentación da correspondente solicitude, para o caso de dispoñer de escritura pública formalizada con anterioridade á referida data. 
• Que nin a persoa solicitante nin ningunha das persoas integrantes da súa unidade de convivencia sexan propietarias ou usufrutuarias dalgunha vivenda en territorio español (ver excepcións na convocatoria).
• Para poder acceder ás axudas é preciso que a vivenda xa estea construída no momento da presentación da solicitude.

Modalidade A: Adquisición de vivendas localizadas nun municipio pertencente ao territorio da Comunidade Autónoma de Galicia cunha poboación residente igual ou inferior a 10.000 habitantes

• Vivenda:
  • O prezo da vivenda non pode ser superior a 120.000€.
• Contrato:
  • Ter subscrito con posterioridade ao 31 de outubro de 2023 un contrato privado ou, no seu caso, unha escritura pública de adquisición dunha vivenda, nos termos previstos nesta resolución.
• • Tamén poderán solicitalas as persoas que presentasen unha solicitude de subvención ao abeiro da Resolución do 26 de decembro de 2022 e lles fose denegada por esgotamento do crédito previsto na convocatoria. Neste caso, deberán cumprir todos os requisitos sinalados nesta resolución, excepto o referido á data de adquisición da vivenda.
• Persoas beneficiarias:
  • Ter menos de 36 anos no momento de solicitar a axuda ou no momento da subscrición do contrato privado ou da formalización da escritura pública de compravenda, cando esta se realice antes da publicación da correspondente convocatoria.
  • Ingresos iguais ou inferiores a 3 veces o IPREM (ver supostos específicos na convocatoria).

Modalidade B: Adquisición de vivendas situadas no ámbito dun centro histórico

• Vivenda:
  • Debe estar situada no ámbito dun centro histórico dos citados no anexo da Orde do 1 de marzo de 2018, pola que se determinan os centros históricos.
  • Prezo: o prezo máximo de venda dependerá do concello onde estea situada (ver convocatoria).
• Contrato: Ter subscrito con posterioridade ao 2 de outubro de 2023 un contrato privado ou, no seu caso, unha escritura pública de adquisición dunha vivenda, nos termos previstos na convocatoria.
• Persoas beneficiarias:
  • Ingresos iguais ou inferiores a 6,5 veces o IPREM.
  • O requisito do empadroamento só será exixible no momento da finalización das obras, para o suposto de que fora necesaria a súa rehabilitación.

Modalidade C: Adquisición de vivendas cualificadas definitivamente como vivenda protexida de protección autonómica de réxime xeral ou especial

• Vivenda:
  • A vivenda debe ter sido cualificada definitivamente como vivenda protexida de protección autonómica de réxime xeral ou especial na data de publicación da correspondente convocatoria, e debe tratarse dunha adquisición en primeira adxudicación ou transmisión.
  • O prezo máximo será o previsto na cualificación definitiva.
• Contrato:
  • Ter subscrito con posterioridade ao 2 de outubro de 2023 un contrato privado ou, no seu caso, unha escritura pública de adquisición dunha vivenda, nos termos previstos na convocatoria.
  • O contrato privado deberá estar visado pola área provincial do IGVS.